Директорот на Apple, Стив Џобс, вчера ja претстави последната верзија на популарниот smart телефон iPhone на конференцијата Worldwide Developer во Сан Франциско.
Новиот iPhone е направен од метал, кој всушност е и неговата антена, а екранот е подобрен во однос на претходните модели и има дури 326 пиксели по инч. iPhone 4 е 24 отсто потенок од својот претходник, односно тој е дебел само 9,3 милиметри.
Џобс истакна дека редизајнот е „најголем скок“ на компанијата откако е претставена првата верзија на iPhone, а се осврна и на тоа дека на јавноста веќе и се познати некои од перформансите на iPhone 4 бидејќи еден од вработените го изгуби својот прототип во кафуле, па на блогот Gizmodo неодамна беа објавени деталите на телефонот.
- Некои од вас ова веќе го виделе, изјави Џобс за време на конференцијата и додаде дека новиот iPhone има предна камаера која овозможува видео повици, додека камерата која се наоѓа на задната страна е подобрена со LED блиц.
Имено, камерата има пет мегапискели, пет пати дигитален зум, a iPhone содржи сопствен A4 процесор, кој се наоѓа и во iPad.
Новиот iPhone има подобра батерија која овозможува десет часа гледање на видео, седум часа разговор и 300 часа standby. iPhone 4 на корисниците им овозможува користење на повеќе апликации истовремено, а корисниците преку овој телефон ќе можат да ја играат и популарната игра Farmville.
- Ова е еден од најубавите дизајни кои некогаш сте ги виделе. Без сомнение, овој е iPhone e најубавото нешто што сме го направиле, изјави Џобс, кој напомена дека Apple во последните три години продал повеќе од 50 милиони iPhone телефони.