Научници од универзитетот на Алабама откриле бизарна техника за откривање на нови природни соединенија кои еден ден би можеле да се употребуваат во нови лекови.
Тие развиле човечки „зомби-клетки“ кои технички не се повеќе живи, но со мембрани кои продолжуваат да се врзуваат со различни потенцијално корисни соединенија во примероците.
За да ги креираат ваквите клетките, тие ја отстраниле внатрешноста на клетките со растворувачи и клеточната обвивка која останала ја обвиткале со магнетни наночестички на железо оксид.
Тоа оставило една корисна способност кај овие клетки – нивните ѕидови сè уште биле способни за интеракција со активните соединенија, издвојувајќи ги од природните примероци. Тимот научници се надева дека оваа техника би го забрзала процесот на селекција помеѓу стотици соединенија во природни продукти кој трае со недели па и месеци, на само неколку дена.
Така, на пример, би можеле многу побрзо да се издвојат активните соединенија од билки и други природни организми како габите, со што драматично би се забрзал процесот на идентификација на нови активни состојки за креирање на лекови.