Истражувачи успеале да „прелажат“ клетки од рак на дојка да се претворат во масни клетки, со што се спречило нивното понатамошно ширење. За да го изведат тоа, тимот истражувачи користел патека која ја имаат метастазирачките канцерогени клетки.
Кога ќе си го пресечеме прстот или кога органите растат во фетусот, епителните клетки се претвораат во вид на матични клетки наречени мезенхим (ембрионално врзивно ткиво од кое настануваат сите други врзивни и потпорни ткива) и потоа се реформираат во било какви клетки кои на телото му се потребни.
Овој процес e наречен епително-мезенхимна транзиција (ЕМТ) и веќе подолго време е познато дека канцерите ја користат оваа патека, како и спротивната (МЕТ – мезенхимно-епителна транзиција), за да се шират низ телото и метастазираат.
Истражувањето било спроведено врз глувци на кои им била имплантирана агресивна форма на човечки рак на дојка, па потоа биле третирани со лек за дијабетичари, росиглитазон, и третман за канцер, траметиниб. Благодарение на овие лекови, кога канцерогените клетки користат една од двете транзициски патеки, наместо да се шират тие се претвораат во масни клетки, во процес наречен адипогенеза.
Иако не сите канцерогени клетки го прават тоа, оние кои минуваат низ адипогенезата не се враќаат во нивната првобитна форма.
Причината за тоа е што траметинибот го подобрува транзицискиот процес на клетките (од канцерогени во матични) и ја зголемува конверзијата на тие матични во масни клетки.
Росиглитазонот е помалку важен лек, но во комбинација со траметинибот ја помага конверзијата во масни клетки. И двата лека се веќе одобрени од FDA, што би требало да го олесни одобрувањето на овој нов третман за да клинички се испробува врз луѓе.