Клиничка студија откри дека соединение пронајдено во отровот од пчели, може да помогне во справувањето со агресивните форми на рак на дојката, без да ги стави во ризик здравите клетки.
Како дел од истражувањето експертите од Универзитетот во Западна Австралија користеле отров од 312 пчели пронајдени во Перт, Западна Австралија, Ирска и Англија.
Тимот ги тестирал ефектите од мелитинот (состојка на отровот од пчели) врз различни видови карциноми на дојка кои имаат ограничен третман и откриле дека тој брзо ги уништува туморите и канцерогените клетки.
Научниците успеале да извлечат мелитин од отровот, да го синтетизираат и потоа да го искористат за да убијат и до 100 проценти од клетките на ракот, без да влијаат на нормалните клетки.
Австралискиот тим открил дека мелитинот може „селективно и брзо“ да ја намали одржливоста на тројно-негативниот карцином на дојка, како и другите канцерогени клетки.
Водечкиот истражувач, д-р Сиара Дафи, изјави дека мелитинот во вистински концентрации може да се користи за целосно уништување на клеточните мембрани на ракот во рок од 60 минути. Освен тоа тој може значително да ги намали хемиските пораки на клетките на ракот кои се од суштинско значење за растот и поделбата на клетките на ракот.