Сибир можеби го крие лекот за една од најопасните болести на денешницата, СИДА-та. Руските научници велат дека посебен вид на печурки кои растат во Сибир може да се користат за успешно справување со оваа болест. Тие тврдат дека чага печурката која расте на кората од брезите покажува својства кои треба да се подложат на понатамошно истражување.
Истражувачкиот тим од Вектор институтот, истакна дека во моментот работи со три вида на печурки кои би можеле да се користат во антиретровирусната медицина, но чага печурката досега се покажала како најветувачка.
-Спроведовме истражување и за првпат селектиравме 82 видови од 33 типови на печурки кои растат во Југозападен Сибир. Чага печурките кои се познати во Сибир, покажуваат најголем спектар на антивирусна активност, изјави портпаролот на институтот.
Овие печурки покажале мало ниво на токсичност и силен антивирусен ефект против грип, сипаница, но и ХИВ вирусот кој е предизвикувач на СИДА. Чага печурките се користат со векови од страна на локалните исцелители, а се верува дека се мошне корисни во борбата против ракот.