Од матични клетки развиле срцево ткиво

Научниците од американскиот универзитет во Калифорнија и институтот за кардиоваскуларни болести „Gladstone“ успешно го извеле лабораторискиот експеримент на издвојување матични клетки од ткива на кожата и нивната трансформација во функционални клетки на срцево ткиво. Истражувачите тврдат дека од трансформацијата направиле микроткива како што се оние во срцевите комори.

Шефот на истражувачкиот тим, Кевин Хелеј, истакнал дека ова е прв случај на вештачко производство на срцеви комори.

- Оваа техника забележително ќе го унапреди развојот на срцевото ткиво кај фетусот, но ќе помогне и при лечење на вродени срцеви мани кај бебињата. Исто така, ќе помогне и во прецизно утврдување на контраиндикациите предизвикани од лекови кај бремени жени, тврди Кевин.

Матичните клетки се основа на клетките кај секој човечки организам, од кои се создаваат сите други клетки, органи и човечки ткива. Кога се раѓа бебето, матичните клетки ја завршиле својата основна функција на создавање организам и остануваат во телото како резерва која служи за обновување и замена на оштетените клетки во текот на животот.