Едно од најпознатите светски имиња од делот на климатските науки, поранешниот атмосферски физичар на НАСА и сегашниот професор на универзитетот во Колумбија, д-р Џејмс Хансен, оваа недела ја објави долгоочекуваната студија во која предупредува како порастот на температурата од само 2 степени претставува „неверојатна опасност“ за човештвото.
Истражувањето на д-р Хансен открива дека во следните 50 години, нивото на морето ќе порасне за 15 метри. Исто така, тој напомнува дека порастот на температурата од само еден степен може да предизвика пораст на нивото на морето за 5 до 10 метри, како и појава на сè поголем број екстремни олујни невремиња во наредните векови.
Хансен, заедно со 16 климатолози, кои работеле на истражувањето, го нарекле овој извештај „предупредување за човештвото“ со порака до сите светски власти да покренат мисии за намалување на емисиите ни ефектот на стаклена градина.
- Пораката на креаторите на политиката гласи дека се наоѓаме во глобална криза која бара меѓународна соработка насочена кон намалување на емисиите на гасови, што побрзо и поефикасно, изјавил д-р Хансен.
Неговото истражување се темели на топењето на глечерите и сантите мраз на Гренланд и Антарктикот. Тие изјавуваат дека со пораст на глобалните температури, ќе дојде до брзо намалување на мразот со што големите количини на ладна вода ќе се прошират во светските мориња и ќе предизвикаат промени на циркулацијата на водата, по што би се подигнало нивото на светските мориња и тоа со брзина која нема да може да се запре.
- Нарушувањата во општеството и економските последици се само една последица од бројните случувања кои ќе се случат до крајот на овој век, а подигнувањето на нивото на морињата може да биде погубно за целото човештво, додаде Ханс.