Истражувачите од Harvard University креирале 3D материјал способен да ја менува големината, волуменот и формата и да издржува огромни тежини.
Новиот материјал со влијание на надворешна сила може да поприми најразлични форми (па дури и самиот да се притиска/деформира), а кога е во сплескана состојба има способност да издржи тежина на слон – инаку, просечен слон тежи од округло 4 до 7 тона.
Johannes T.B , главниот автор на студијата напишана во врска со овој материјал, вели дека неговиот тим го создал со цел да биде користен во ре-програмабилни архитектонски објекти. Тие во објектот направен од материјалов вметнале пневматски активатори (т.е воздушни џебови) на кои, со програмирање, можат да им се даваат „упатства“ како да го превиткуваат и формираат. Потоа, од 64 помали коцки (т.е „ќелии“) наредени 4х4х4, создале структура (инспирирана од оригами техниката наречена „snapology”, која можела да расте и да се намалува преку манипулирање на индивидуалните ќелии. Нејзините димензии биле 36х36х36см и тежела само половина килограм, а кога била комплетно сплескана била доволно цврста да издржи огромни тежини пред повторно да се врати во првобитната форма.
Промената во структурата исто така ја менува и вкочанетоста на материјалот, што му дозволува да биде вметнат во разни типови на активатори како диелектрични (електрични изолатори кои можат да бидат поларизирани со примена на електрично поле) , термални, или пак во вода.
Бидејќи секоја структура направена од овој материјал би била комплетно скалабилна, тој би функционирал во најразлични големини – од изработка на минијатурни хируршки стентови до преносни куполи на „надувување“ кои би се користеле во ситуации кога се има случено некоја катастрофа па потребни се привремени објекти за живеење/сместување на повредени. Исто така, тој може да биде програмиран да „комуницира“ со околината на различни начини – на пример, еден кров направен од него, кога времето е топло, ќе може самостојно да ја отвора неговата микроструктура што ќе дозволува на свежиот воздух да влезе во просторијата. Истиот тој кров, доколку почне да врне, самиот ќе ја затвори и ќе се зацврсне за да не ја пропушта водата.