Централа за филтрирање и складирање на CO₂

Ефектите од климатските промени стануваат сè повеќе очигледни со растењето на температурите и емисиите на CO₂. Се предвидува дека до 2030, океаните ќе претрпат масовен губиток на кислород, а помеѓу 2030 и 2050-та, околу 250 000 луѓе може да умрат како резултат на социјалните и еколошки ефекти од овие промени.

Поради тоа се прават напори што повеќе да се намалат емисиите на штетни гасови со користење на обновливи извори на енергија, а сега е изнајден и уште еден начин тоа да се постигне – со „заробување“ и чување на јаглеродот од воздухот. Тоа би вклучувало вшмукување на гасовите кои го предизвикуваат ефектот на стаклена градина, и нивно складирање.

Швајцарската компанија Climeworks ќе изгради пилот централа во близина на Цирих која треба да проработи во септември или октомври и која ќе го вшмукува и филтрира јаглеродниот диоксид (CO₂) од воздухот, кој ќе биде „заробуван“ во сунѓерест филтер, од кој што ќе може да биде ослободен само со загревање.

Компанијата потоа овој складиран гас планира да го продава во големи количини ($600 за еден тон) на компании од земјоделската индустрија, како и на производители на газирани пијалаци. Една ваква централа ќе биде способна да собира околу 900 тони CO₂ годишно, што е еквивалент на емисии од околу 200 автомобили годишно.

Колку оваа технологија ќе заживее и има успех, останува да се види. Во меѓувреме, други компании како Carbon Engineering (делумно спонзорирана од Bill Gates), пак, преку нивни системи имаат намера да го конвeртираат јаглеродниот диоксид во e-diesel гориво, што значи постојат повеќе начини како овие гасови можат паметно да се искористат.