NASA, во партнерство со Methuselah Foundation’s New Organ Alliance, го објави нивниот предизвик за изработка на васкуларно ткиво (Vascular Tissue Challenge) – предизвикувајќи ги биоинженерите од целиот свет да изнајдат ефикасен начин за раснење на човечко ткиво.
Награда од $500 000 ќе добијат три тима кои успешно ќе креираат дебело, метаболички функционално човечко васкуларизирано ткиво од кое би можеле да се развијат органи.
NASA го користи овој натпревар како отскочна даска за тестирање на издржливоста на човечкото ткиво во експедициите во длабоката вселена (како ќе реагираат на радијација, како да се минимизира оштетувањето на здравите клетки и сл.), но исто така верува и дека напорите на биоинженерите ќе имаат шанса да ја подобрат здравствената грижа и на земјата.
Предизвикот беше најавен како дел од White House Organ Summit, чија цел е да се нагласат напорите направени за подобрување на пост-оперативните резултати кај луѓето кои чекаат за трансплантација на органи, како и да се понуди поддршка на живите донатори.
Инаку, за да се добие наградата, тимовите од научници ќе мора да создадат васкуларизирано ткиво подебело од 1 сантиметар, кај кое ќе мора повеќе од 85% од неговите клетки да преживеат по 30 дневниот тест период.
Покрај лабораториските тестирања, тимовите ќе мора да објаснат како понатаму би продолжиле одредени аспекти од нивните истражувања преку микрогравитациски експерименти кои би се правеле на интернационалната вселенска станица.