Според истражувачите од RMIT University во Мелбурн, Австралија, наскоро течни метали кои менуваат форма и можат да бидат манипулирани да формираат разни структури ќе станат реалност.
Група од факултетот за инженерство од RMIT на чело со професорот Kourosh Kalantar-Zadeh работи на меки системски кола кои се однесуваат како живи клетки, автономно се движат и комуницираат меѓу себе – ако го имате гледано Terminator 2: Judgement Day, описов веднаш ќе ве асоцира на T-1000, терминаторот направен од течен метал кој може да менува форма.
Според зборовите на професорот, дури и такво нешто би било возможно во иднина – да се направи 3D метален хуманоид на кој што ќе може да му бидат програмирани функциите.
За да дојдат до овој резултат, инженерите потопувале капки од течен метал во вода помешана со компоненти на киселини, бази и соли. Со менување на хемијата на водата, капките од течен метал можеле да се движат и да ја менуваат формата без никакви надворешни механички, електронски или оптички стимуланси.
Покрај Терминатори, со овој материјал би можеле да се изработуваат подвижни објекти, прекинувачи и пумпи кои ќе можат да функционираат автономно, придвижувани само од течноста која ги опкружува.