Научници од центарот за иновации во индустриската инфраструктура од Nanyang Technological University развиле нов тип на бетон кој е флексибилен и поиздржлив отколку обичниот кој сега го користиме и го нарекле ConFlexPave.
ConFlexPave може значително да ја намали тежината и дебелината на однапред излеаните бетонски плочки, правејќи ги полесни за транспорт и инсталација, со тоа преполовувајќи го времето потребно за на пример, поплочување на тротоари. Исто така, бидејќи е потраен, потребно му е многу помалку одржување во споредба со конвенционалниот бетон.
Покрај цемент, вода и песок, ConFlexPave се состои и од специјални синтетички влакна (полимерски микровлакна) кои му овозможуваат да се растегнува и витка под притисок, притоа зголемувајќи ја отпорноста на лизгање.
Поради специфичните материјали потребни за да се направи, овој нов тип на бетон чини малку повеќе отколку обичниот, но според Др. Yang En-Hua кој е водач на проектот, откога ќе се земе в предвид неговиот животен циклус и намалувањето на работната сила потребна за инсталацијата, испаѓа дека всушност е поекономичен во секој поглед.
Потенцијалот на ConFlexPave се гледа во намалување на штетата врз инфраструктурата предизвикана од земјотреси или сл.