Дрвото е јак и разновиден градежен материјал, но има недостатоци – скапува, го јадат бубачки и ја блокира светлината. Обичните стаклени панели, пак, не се ништо подобри – лесно се кршат и пропуштаат голем дел од енергијата во и надвор од просторот во кој што се вградени.
Инженери од University of Maryland решиле како да го искористат најдоброто од „двата света“ и преку патентиран процес да создадат проѕирно дрво - материјал кој е многу поцврст и има висока апсорбција на енергија која ги елиминира безбедносните проблеми кои се среќаваат кај обичното стакло.
Точниот и детален „рецепт“ за правење на проѕирното дрво сега засега се држи во тајност, а единствено се знае дека во процесот се користат белило, епоксидна смола и секако, дрво.
Прво, истражувачите го потопувале дрвото во натриум хидроксид, хемикалија која го отстранува лигнинот, т.е состојката од дрвото која му ја дава бојата и го прави јако и отпорно на џвакањето од штетници. Овој процес траел 10-тина минути за едно парче дрво и до 24 часа за една помала клада.
Потоа, дрвото се ставало во „чиста течност“ – во оваа фаза тоа било крцкаво и лесно се ронело. Вака процесирано, било потопувано во епоксидна смола слична на лепак која го зацврснувала и го правела проѕирно. Овој процес ги претвора целулозните цевки во дрвото кои инаку служат за пренос на водата кон лисјата, и на шеќерите кон коренот, во високо ефикасни дифузери на светлина.
На ваквото проѕирно дрво му е доволно многу мало количество светлина за да целосно и рамномерно го осветли, а и поради задржаните својства од „оригиналното“ дрво, тоа е многу подобар изолатор од топлина.