Во мај 2015, Европската Вселенска Агенција комплетно го изгуби контактот со сондата Philae, дел од мисијата Rosetta.
Сега, на скоро еден месец пред оваа мисија да заврши, камерите во висока резолуција на леталото Rosetta кое орбитира околу кометата, конечно ја забележале локацијата на изгубената сонда.
Во ноември 2014-та, Philae требаше да слета на кометата наречена 67P/Churyumov-Gerasimenko. Тоа и го направи, но при слетувањето два пати се одби од површината на кометата и слета во реон кој е во сенка. Бидејќи до соларните панели на сондата не можело да дојде доволно светлина за да ги наполни, таа функционирала 57 часа пред да се исклучи.
Кога кометата 6 месеци подоцна се приближила до сонцето, Philae собрала доволно енергија да прати сигнал назад до земјата, и после тоа од неа немало ни трага ни глас.
На почетокот на овој месец, Rosetta ја фотографирала кометата од далечина од скоро 3 километри, а по детална анализа на фотографиите конечно во еден од процепите била забележана Philae.
Иако сондата веќе не функционира, нејзиното пронаоѓање ќе им овозможи на научниците полесно да ги „дешифрираат„ последните слики кои таа ги имала испратено, а и точната локација на нејзиното „вечно почивалиште“ барем нема да биде мистерија.