Истражувачи постигнале огромен напредок во регенеративната медицина со тоа што пресадиле функционални очи на опашката од слепи Xenopus полноглавци, со чија помош тие прогледале, т.е станале способни да процесираат визуелни информации од околината.
Мајкл Левин и неговиот тим од истражувачкиот центар Ален при универзитетот Туфтс откриле дека пресадувањето на функционални очи на опашките на полноглавците било особено ефективно кога тие биле третирани со лекот Zolmitriptan, кој го активира серотонинот.
Тој ги активира рецепторите 1B и 1D (5-HT1B/D), кои се поврзани со нервниот развој кој е неопходен за зголемувањето на инервацијата, интеграцијата и функцијата на трансплантираните органи. Со помош на леков, полноглавците покажале исклучителна способност во детектирање на бои, фокусирање на објекти, и конзистентно следење на разни модели на движење.
Резултатите од студијата ја потенцираат пластичноста на мозокот, сугерирајќи дека централниот нервен систем има потенцијал да се адаптира во функцијата и конективноста доколку се создадени вистински услови за тоа, а разбирањето на овие процеси е од исклучителна важност за развивање на терапии со матични клетки и трансплантирање на органи.