Наскоро роботска кожа која самата ќе се залекува

Истражувачи од Хајдерабад во Индија откриле авто-лекувачки својства на материјалот графен. Тие се надеваат дека ова откритие ќе доведе до развивање на флексибилни сензори кои ќе можат самите да се залекуваат и да се користат за изработка на артифициелна кожа. Ова би им овозможило на роботите да имаат кожа која самата се залекува, исто како кај луѓето.

Графенот е најсилниот материјал во светот досега, а се состои од лист од чисти јаглеродни атоми кој е еден милион пати потенок од хартијата – доволно за да се квалификува како дводимензионален. Иако моментално е прескап за комерцијална изработка, останува фактот дека е еден од наноматеријалите со иднина која обеќава, благодарејќи на големиот распон од потенцијални апликации и уникатни карактеристики.

Човечката кожа е тешка за реплицирање поради нејзините самолекувачки својства. Нежна е, но и екстремно заштитна, лесно свитлива но отпорна на стрес. Емулирање на овие квалитети на кожата креирана со артифициелни супстанци претставува голем предизвик, бидејќи виткањето, гребењето и развлекувањето на овој тип на артифициелна кожа за роботите ги прави подложни на разни пукнатини и кинења.

Во случај на графенот, суб-нано сензор вграден во него би можел да ја „насети“ пукнатината, и тој самиот да го започне поправањето и да го спречи нејзиното ширење, без потреба од било каков надворешен стимул, и на собна температура.

Истражувачите веруваат дека оваа технологија ќе биде многу скоро на располагање, можеби за имплементирање во наредната генерација роботи.