Истражувачите конечно успеале да ја завршат првата студија истражувајќи го Patagotitan mayorum, најголемото животно кое било кога чекорело на нашата планета.
Иако досега било воглавном непознато како толку масивни копнени животни успевале да се развиваат, новата студија нуди неколку претпоставки.
Откриен во 2014-та, овој масивен диносаурус се сметал за еден од најголемите кои постоеле на Земјата. Тој имал просечна должина од 37 метри, а тежел скоро 69 тони – колку еден спејс шатл, или 9 слонови. Истражувачите тогаш отркиле остатоци од околу 6 или 7 помлади диносауруси од овој вид во Аргентина, а нивните фосили вклучувале делумни скелети со вкупен број на коски од 150 – меѓу кои и огромни ребра, пршлени и фемури поголеми од возрасен човек.
Овие џинови чекореле низ шумите од периодот Креда пред некои 100 милиони години, а научниците сметаат дека за време на тој период во Патагонија се случила „експлозија“ во разновидноста на цветни растенија, кои штотуку се појавиле на еволутивната сцена. Тие на некој начин претставувале бесконечна трпеза за титаносаурусите од тоа време, кои едноставно станувале сè поголеми и поголеми поради обемната исхрана.