Официјалните лица кои работат во Помпеја скоро откопале скелет на човек кој бил смачкан од огромен камен блок додека бегал од ерупцијата на планината Везув.
Во 79 год., вулканската ерупција на Везув ги прекрила блиските градови Помпеја и Херкуланум со пепел и лава – точниот број жртви не се знае, но археолозите имаат откопано остатоци од најмалку 1500 луѓе во и околу овие два града, а се верува дека уште многу животи се изгубени под целиот тој вулкански материјал.
Смачканиот скелет бил откриен во областа Vicolo dei Balconi близу Помпеја, а археолозите веруваат дека припаѓал на маж не постар од 30 години кој се обидел да се скрие од врнежите вулкански отпад во една од уличките во градот. Неговото тело било пронајдено на ниво на прв спрат, сугерирајќи дека дебел слој пепел веќе бил паднат на тлото кога камениот блок од некоја градба бил исфрлен од вулканскиот облак и слетал на главата и рамениците на човекот. Остатоците од неговиот череп не се пронајдени, а се чини и дека од него ништо и не е останато.
Иницијалната студија на коските открила дека на едната нога имал лезии, што покажува дека можеби имал некој хендикеп кој му ја намалувал способноста да трча и да се спаси.
За разлика од овој несреќен човек, иконските „замрзнати фигури“ на Помпеја не се мумифицирани остатоци, туку излеани модели на луѓето. Во 1860, италијанскиот археолог Џузепе Фиорели открил дека во шуплините формирани во вулканскиот пепел каде телата на луѓето се дезинтегрирале може да се истури цемент и да се излее нивната форма.