Меѓу скршени тегли и парчиња стакло, во една гробница во Египет било пронајдено она што сега се испоставило дека е најстарото сирење на светот, чиј „рок на траење“ истекол пред некои 3200 години.
Мистериозната бела супстанца за која се верува дека е направена од млеко од крава или коза била откриена пред неколку години во гробницата на Тамес, кој бил градоначалник на Мемфис, Египет, во 13-тиот век п.н.е. Иницијално, гробницата била откриена во 1885-та, за потоа да биде скриена под песокот сè до нејзиното повторно откривање во 2010.
Додека археолозите се сомневале дека се работи за храна, дури сега е потврдено дека се работи за сирење. Тестови за да тоа го потврдат биле направени од тимови од универзитетот на Катанија во Италија и универзитетот на Каиро.
Но, тестовите на ова сирење исто така откриле траги на бактерија која предизвикува бруцелоза, инфективна болест предизвикана од консумирање на непастеризирани млечни продукти или месо од инфицирани животни. Бруцелозата може да предизвика треска, главоболки и болки во мускулите.
Др. Енрико Греко од универзитетот во Катанија бил дел и од други слични откритија, како минатогодишното откривање на тогаш најстарото вино на светот (кое сега е на второ место), и на најстарото италијанско маслиново масло.