Мистериите поврзани со спиењето почнуваат да се разрешуваат благодарение на нова студија која открива како мозокот ги трансформира настаните кои ни се случиле во текот на денот во целосно енкодирани мемории.
Новото истражување индицира дека селектирањето на овие мемории се случува во периоди на екстремно ниска активност на мозочните бранови, кога повеќето кортикални неврони се исклучуваат за да им дозволат на оние вклучени во креирање на специфична меморија да си ја вршат својата работа.
На научниците со декади им е познато дека за време на спиењето невроните низ кортексот осцилираат помеѓу периоди на активност и периоди на тишина, а бидејќи на активната фаза и претходи наплив на активност во хипокампусот – делот на мозокот кој ја процесира меморијата - долго време се претпоставувало дека оваа осцилација некако служи за енкодирање на скорешни настани во мемории.
Авторите на студијата истренирале глувци да вршат задача за просторна меморија и ја снимале нивната активност во хипокампусот и кортексот за време на вршењето на задачата како и за време на првите 2 часа од спиењето. Тие откриле дека додека глувците спиеле, нивниот хипокампус спонтано ги повторувал движењата од претходно, индицирајќи дека ја повторува меморијата од настанот.
Очекувано, тоа предизвикало зголемување на активноста во кортексот, по што следеле делта бранови, а потоа и невронска тишина. Меѓутоа, секој пат кога тоа се случувало, мал дел кортикални неврони останувале активни додека останатите спиеле. Со следење на овој процес, тимот истражувачи открил дека моделите на активност во хипокампусот всушност предвидувале кои кортикални неврони ќе останат активни, што им овозможило во реално време да гледаат како краткотрајните мемории во хипокампусот се сочувале како стабилни мемории во кортексот.
За да го потврдат нивното откритие, истражувачите потоа вештачки ги стимулирале глувците кои спијат, предизвикувајќи погрешни неврони да останат активни за време на делта фазата и откриле дека тоа ги спречувало животните да ги комплетираат задачите за просторна меморија следниот ден.