Научници од универзитетот Стенфорд креирале леплив гел кој во форма на спреј се аплицира на дрвата и овозможува долготрајна заштита од пожари.
Гелот опишан како „еколошки бенигна вискоеластична течност базирана на целулоза“ всушност е носител на амониум полифосфат (АПП), најупотребуваната противпожарна суровина која се користи за гаснење на шумските пожари во САД.
Во сегашната формулација, АПП се испорачува во течност дизајнирана да формира влажна и вискозна бариера на растенијата. Околу 380 милиони литри се исфрлаат врз вегетацијата на Калифорнија секоја година, но само на онаа која е на пат на пожарите. Противпожарните карактеристики траат само 1 или 2 дена, што го прави АПП неподобен за користење во планирани стратегии за превенција.
Новиот медиум го надминува овој проблем и ги заштитува растенијата од пожари и до еден месец. Причината за тоа е што гелот е конструиран од целулозни деривати, вклучувајќи хидроксиетилцелулоза и метилцелулоза, со микроскопски честички на силика на неговата површина.
Лабораториските тестови, како и оние на отворено на површина од 3 квадратни метри исполнета со трева со различна должина и густина, покажале импресивни резултати. Додека нетретираните области изгореле скоро целосно за 60 секунди, оние третирани со гелот не гореле воопшто.
Значајна противпожарна заштита останала дури и по симулирани 12 милиметри врнежи од дожд.
Лабораториските тестови, пак, потврдиле дека тој не е штетен за околината и дека не ја менува респирацијата и микробската активност на билките.
Гелот целосно деградира за околу 30 дена, што е доволно да овозможи заштита од палење за време на ризичните периоди.
Следниот чекор на истражувачите ќе биде да се пронајде начин за комерцијална продукција на овој гел, како и да се тестира неговата ефикасност во разни опкружувања.