Додека неколку различни стартап компании веќе продаваат “месо“ добиено од билки, калифорнискиот стартап Air Protein тврди дека открил начин за правење на месо од воздух – надоградувајќи идеја која NASA ја имала во 1960-тите.
Според нивниот вебсајт, NASA смета дека можеби е возможно да се користат микробите наречени хидрогенотрофи за креирање на систем за хранење на астронаутите во Вселената.
Астронаутите би издишувале јаглерод диоксид, кој микробите би го јаделе и конвертирале во хранливи состојки. Потоа астронаутите би ги јаделе овие состојки, повторно започнувајќи го циклусот.
Ова истражување никогаш не се реализирало во Вселената, но Air Protein откриле дека хидрогенотрофите би можеле да ги хранат со комбинација од СО2 и други нутриенти во ферментирачки уреди тука на Земјата, што резултирало со кафеав прашок кој баш и не личи на месо (ниту пак има некаков вкус), но кој е богат со нутриенти и го има истиот аминокиселински профил како животинското месо.
Од компанијата велат дека процесот трае само неколку дена и би можел да биде еколошка алтернатива за традиционалната продукција на месо.