Тетродотоксинот е еден од најсмртоносните неуротоксини во природниот свет, околу 1000 пати попотентен од цијанидот. Истиот го има во одредени видови риби кои во рестораните чинат и над $100, а кои пред да се јадат мора многу внимателно да се исчистат од страна на готвач лиценциран за тоа.
Сега, оваа потентна хемикалија за прв пат е синтетизирана во лабораторија, со надеж дека еден ден ќе помогне во создавањето на нов лек за намалување на болката кај пациентите со канцер.
Тетродотоксинот доаѓа од бактериите како Pseudoalteromonas, Pseudomonas и Vibrio, кои живеат во животинските домаќини, а ги има во органите на многу морски животни како одредени октоподи, полжави и сл. Најпознатиот примерок кој го содржи е рибата фугу (pufferfish) која во Јапонија е деликатес и која доколку не е подготвува како што треба, може да биде фатална за луѓето.
Само 1 милиграм тетродотоксин е доволен за да убие човек, поради што готвачите мора специјално да бидат тренирани како да ги исчистат органите како црниот дроб, очите и јајниците, кои содржат најмногу од овој отров.
Постојат и нетоксични фугу риби растени во мрестилишта, но вистинските „познавачи на храна“ ги претпочитаат токсичните бидејќи нивно консумирање им претставува еден вид на авантура.
Тетродотоксинот ги блокира нервните импулси во телото преку блокирање на каналите на натриум во клетките, кои се отвораат и затвараат со електрицитет. Јадењето, инјектирањето, или вдишувањето тетродотоксин може да доведе до парализа, потешкотии со дишењето, па дури и смрт. Месото од овие риби не е дозволено во ЕУ, а во земјите каде што се консумира постојат строги закони кои диктираат кој смее да ги купува и продава таквите производи. Дури и покрај сите овие санкции, сè уште постојат случаи на труење и смрт.
Во многу малечки дози, нервно-блокирачките ефекти на тетродотоксинот може да се користат за овозможување ефективна аналгезија за луѓето кои имаат силни болки, како оние предизвикани од некои третмани за канцер.
Точниот механизам за тоа не е целосно јасен, поради што се појавила потребата за едноставен и ефтин начин да се добие овој токсин за да се истражува. За штета на истражувачите, тетродотоксинот има необична и комплексна структура која е тешко да се реплицира – помали секции од токсинот биле синтетизирани во претходни студии, но во оваа за прв пат била постигната целосна синтеза.
Тимот истражувачи од универзитетот Нагоја во Јапонија креирал нова хемиска патека за реплицирање на целата структура на неуротоксинот, без потреба од рибата.
Овој нов процес за репродуцирање на тетродотоксин во лабораторија е голем чекор напред кон отклучувањето на карактеристиките на овој моќен неуротоксин.