Живееме во период на најголеми поплави од реки во изминатите 500 години

Во изминатите три децении Европа е опустошена од најголеми поплави од реки во последните пет века, покажува студија на Универзитетот во Виена, во која учествуваа 34 истражувачки тимови од различни делови на Европа.

Истражувањето покажува дека карактеристиките на поплавите се разликуваат од оние од претходните векови во однос на волумен, температура на воздухот и сезоната, пишува во написот објавен во списанието „Nature“.

На многу места поплавите се поголеми за разлика од порано, временскиот интервал е променет, а односот помеѓу поплавите и температурата на воздухот е обратен.Во денешницата глобалното затоплување е еден од главните двигатели на порастот на поплавите, додека во минатото се случувале почесто во студените периоди.

За студијата беа анализирани десетици илјади историски документи што содржат извештаи за поплави од 1500 година до 2016 година. Анализата на податоци идентификуваше девет периоди со чести поплави и подрачја каде се случувале поплавите.