Во древното наоѓалиште Сакара, јужно од Каиро, Египет, археолози открија 27 саркофази, стари над 2.500 години.
Според тамошните медиуми, 13 ковчези се откриени на почетокот на месецов, а другите 14 биле откриени подоцна. Се работи за добро сочувани дрвени сандаци, сите живописно обоени. Најдени се и други, помали артефакти.
Во известувањето на египетското Министерство за антиквитети се вели дека првичните истражувања покажуваат дека ковчезите биле целосно затворени и не се отворани 2.500 години, откако биле закопани.
Сакара била активна некропола повеќе од 3.000 години, а денес е под заштита на УНЕСКО.