Една од најголемите светски мистерии, идентитетот на Мона Лиза, пред три децении ја решил српскиот уметник Предраг Бајо Луковиќ. Тој смета дека зад ликот на Мона Лиза се наоѓа портретот на уметникот кој го нацртал портретот, односно Леонардо да Винчи. Речиси 20 години подоцна, неговото откритие без обелоденување на изворот, се нашло на кориците на книгата „Кодот на Да Винчи“.
- Со години ја цртав Мона Лиза. Првата копија ја направив уште во средношколските денови и ја изложив на првата моја самостојна изложба. Потоа решив да го насликам Да Винчи и ми се чинеше дека тоа веќе сум го сликал. Направив скица и сфатив дека тоа е едно исто лице. Меѓу Мона Лиза и него немаше никакви разлики. Решив да ги насликам на едно платно и сè се совпаѓаше совршено. По тие истражувања за мене веќе не постоеше сомневање дека Леонардо зад Мона Лиза го сокрил сопствениот портрет, вели Бајо.
Оваа хипотеза, Бајо ја развил преку сликата „Портрет на една тајна“, која за прв пат ја претставил во јавноста во 1983 година на Октомврискиот саем, а потоа и на Народниот музеј во Белград. Поради големиот интерес, изложбата траела за шест месеци подолго од планираното време.
- Името на сликата не го дадов случајно, бидејќи на неа се крие тајна чувана речиси 5 века. Во 1986 година, добитничката на Оскар за анимација, Лилијан Шварц, го заклучила истото. До овој заклучок дошла преку компјутерска анализа, што ја потврди мојата идеја. Не сакав да ја тужам, затоа што сметав дека заедно се бориме за иста работа.
Мона Лиза е направена меѓу 1503 и 1505 година на дрво од јасика. Во 1517 година сликарот ја донел во Франција, со векови непознозната за јавноста. Но во 1804 година влегла во Лувр. По Француската револуција богатството во тој музеј станало достапно за публиката, но оваа слика ја земал Наполеон и ја чувал во спалната соба. При крајот на 19 век е украдена, а тоа предизвикало огромен скандал, но и делото станало познато. По неколку години е пронајдена во Фиренца и вратена. Денес се наоѓа во издвоен дел во Лувр, чие уредување чинело пет милиони евра!