Новите батерии би можеле да имаат многу поголем капацитет и да траат практично вечно, велат истражувачите.
Експертите од Технолошкиот институт од Масачусец и Samsung тврдат дека употребата на батеријата во цврста состојба, за разлика од постоечките течни електролити, може да се решат сите проблеми кои луѓето ги имаат со денешните батерии.
Најголем дел од електронските уреди од телефони до автомобили користат литиум-јонски батерии. Тие се добро решение, но имаат релативно мал капацитет и брзо се трошат, а секогаш претставуваат опасност од експлозија.
Сега истражувачите тврдат дека новите електролити во цврста состојба можат да бидат многу поефикасни и побезбедни за употреба.
“Сите пожари кои досега сме ги виделе на авионите, Тесла автомобилите и слично се случуваа поради течните електролити“, вели Гербранд Цедер, професор кој работеше на новиот материјал со уште пет истражувачи.
“Самиот литиум не е запалив, како што е случај во овие батерии. Со цврсти електролити нема безбедносни грижи, можете да ги фрлате на под, да ги удирате и нема да дојде до пожар“, објаснува професорот.
До сега развивањето на цврсти батерии беше отежнато бидејќи беше тешко да се пронајдат цврсти материјали кои ги спроведуваат честичките еднакво брзо како течноста. Но, тимот ги анализираше својствата на постоечките литиум-јонски материјали и пронајде состојки кои се доволно добри проводници.
Овие батерии покажаа многу подобри резултати во ладни услови, а е докажано дека траат стотина илјади циклуси.