Инженерите од University of California, Berkeley измислиле сензор кој ги мери метаболитите и електролитите во потта, и резултатите ги испраќа на смартфон апликација.
Прототипот на овој сензор се состои од пет помали сензори споени со електрично коло кои ги мерат метаболитите (гликоза и лактат), електролитите (натриум и калиум), и температурата на кожата. Целиот сензор може да биде сместен во лента за на зглоб или глава, земајќи ги мерките за време на потењето на оној што го носи.
Креаторите се надеваат дека нивниот уред ќе може да детектира здравствени проблеми како што се заморот/истоштеноста, дехидрацијата и опасно високи температури на телото. Вообичаено за ова се зема примерок од крв, но со оваа технологија таа потреба би се елиминирала.
Во дизајнирањето на овој систем бил консултиран физиолог, професор за интегративна билогија на UC Berkeley, а бил испробуван врз волонтери кои правеле разни физички вежби во отворен и затворен простор (како што се возење на статичен велосипед и трчање на стаза во траење од неколку минути па до повеќе од еден час, и сл.)
Иако сега засега сензорот е способен да реагира само на пот (и е наменет за физички активни лица кои се занимаваат со некој спорт), во план е негово адаптирање за да може да се користи и на други телесни течности (за испитување на состојбата на оние кои имаат разни болести или повреди)