Најновата гласина поврзана со Microsoft вели дека истражувачкиот одел на тимот од Редмонд, Microsoft Research се занимава со развој на паметен телефон кој ќе има секундарен екран.
За разлика од Yotaphone чиј секундарен е-инк екран се наоѓа на задниот капак на уредот, Microsoft наводно сака нивниот уред да има преклопен flip механизам на извлекување, што значи дека секундарниот екран ќе се наоѓа со примарниот кога ќе го отворите телефонот.
Покрај тоа, секундарниот екран на Microsoft ќе има функција на touchscreen, што значи дека нема да служи само за нотификации и листање на содржини како е-книги, туку на него ќе може да се работи на ист начин како и на примарниот екран.
Благодарение на тоа, секундарниот екран ќе може да се пренамени во touchscreen тастатура, за да можете полесно и побрзо да пишувате СМС, е-меил и други текстови.
Со оглед на тоа дека Microsoft не сака поради двата екрани батеријата на телефонот пребрзо да се испразни, секундарниот ќе биде е-инк, но не е јасно дали на него ќе може да се активираат сите апликации како на примарниот, при што основниот би се исклучил и со тоа батеријата дополнително би се штедела.
Освен овие информации не се познати други детали, а Microsoft скоро сигурно оваа гласина нема да ја коментира пред да го претстави уредот, што би требало наводно да се случи кон крајот на оваа година.