Hyperloop за првпат предложен во 2013 од Elon Musk е револуционерен систем кој треба да ги замени сегашните методи на патување со комплетно нов, интерконтинентален копнен транспортен систем, составен од огромна мрежа на цевки во кои, во скоро целосен вакуум, лебдејќи ќе се движат капсули во кои ќе има луѓе или товар, со брзина од 760км/ч.
За да Hyperloop стане реалност мора да се надминат многу технички предизвици на кои работат инженери од разни дисциплини – дел од нив се развивањето на системот за погон, пронаоѓањето начин како да се исфрлат издувните гасови од пневматските Hyperloop туби, и сл.
Тука спаѓа и развивањето на нов, футуристички материјал од кој би се правеле Hyperloop капсулите, наречен Vibranium.
Vibranium-от е дело на компанијата Hyperloop Transportation Technologies (HTT), една од неколкуте кои работат на реализирањето на овој проект. Се работи за „паметен“ материјал во кој што се интегрирани илјадници сензори дизајнирани безжично, во реално време, да пренесуваат информации за дијагностиката, температурата, оштетувањата, како и структуралниот интегритет на капсулата. Така, во случај на било каков дефект, таа ќе биде тргната од циркулација за да се репарира.
Самиот материјал е создаден од плетени јаглеродни влакна (carbon fiber), а компанијата тврди дека е 10 пати појак и 5 пати полесен отколку челикот и 8 пати појак и 1.5 пати полесен од алуминиумот. За негова изработка HTT направиле партнерство со словачката компанија наречена C2i, која произведува јаглеродни влакна за автомобили и авиони, а исто така и вклучиле договор со словачката влада, како дел од европскиот Hyperloop систем кој треба да ја поврзе Австрија со Унгарија.