Hyperloop концептот на Eлон Муск периодов често го среќаваме во вестите, бидејќи сè повеќе се ближи денот кога (се надеваме) ќе стане реалност и постојано има некои новости во врска со технологиите кои што ќе ги користи. Но, сега новости доаѓаат и од „другата страна“ - Русија размислува за имплементирање на нивна верзија на овој концепт (вакуумска туба во која вагони за транспорт на луѓе со електромагнетен погон ќе се движат со брзина од 1200км/ч).
Овие вести доаѓаат по изјавата на рускиот министер за транспорт Максим Соколов, кој рекол дека руските научници постигнале прогрес во развивање на концептите за ваков тип на транспорт и дека тој уште пред две години видел некаков прототип во универзитетот за транспорт и врски во Санкт Петербург. Извори од истиот универзитет велат дека првиот чекор ќе биде спојување на пристаништата на Балтичкото Море со карго терминали во Москва, а потоа и спојување на западниот дел на Русија со останатите делови од земјата.
За сето ова да се оствари, ќе биде потребно комплетно масовно менување на инфраструктурата ( само патот од Санкт Петербург до Москва ќе биде во должина од 650км), што во комплет со проектот се очекува да чини помеѓу 12 и 13 билиони долари.