Официјални лица од руската корпорација Rostec тврдат дека 6-тата генерација на руски воени авиони ќе биде презентирана во 2025-та и истите ќе имаат јато од дронови кои ќе ги придружуваат во летовите.
Овие авиони и самите ќе бидат беспилотни и ќе можат да летаат со суперсонични брзини од околу 4-5 Маха, а ќе можат да навлегуваат и во вселенскиот простор над земјината атмосфера. Ќе бидат вооружени со електромагнетни топови со висока фреквенција (со моќност толку голема што доколку би имало луѓе во авионот, таа би ги повредувала), дизајнирани да ги оневозможат непријателските радио сигнали од далечина од околу 10 километри.
Паралелно со ова, САД исто така работат на 6-та генерација на борбени авиони , по претставувањето на 5-тата генерација (F-22 Raptor i F-35 Joint Strike Fighter произведени од Lockheed Martin Corp.), од кои F-35 е сè уште во фаза на развивање. Војската изразила особен интерес за развивање на нови оружја како што се хиперсонични проектили или такви што би функционирале со насочена енергија, наместо за единечна платформа со која што би се решиле заканите на денешницата – сајбер и електронски напади, анти-сателитски и останати типови на проектили и сл.