Електронските уреди стануваат сè помоќни, а многу од нив и сè помалечки. Помалечките од нив, пак, побаруваат значителна количина на енергија за да функционираат, која постоечките батерии сè уште не можат ефективно да ја понудат, особено по подолга употреба.
Научниците од Универзитетот од Централна Флорида развиле нов вид на тенок, флексибилен супер-кондензатор со висока енергетска густина.
Тимот од Технолошкиот Центар за НаноНаука нашол начин да користи дводимензионални материјали како супер-кондензатори, со тоа решавајќи го проблемот со големината. За да еден кондензатор содржи иста количина на енергија како постоечките литиум-јонски батерии, тој би требало да биде многу поголем од нив – но истражувачите развиле едноставна хемиска синтеза за интегрирање на постоечките материјали со дводимензионалните материјали.
Дводимензионалните материјали користени во новото истражување се наречени TMD (transition-metal dichalcogenides) – тие се малечки и овозможуваат брз трансфер на електрони, т.е побрзо полнење и празнење, благодарејќи на јадрото со висока спроводливост. Овие супер-кондензатори се направени од милиони жици тенки неколку нанометри, чија обвивка е направена со TMD материјалот.
Ваквите кондензатори не деградираат бргу, дури ни по 30 000 полнења – во споредба, на литиум-јонските батерии перформансите почнуваат да им слабеат по околу 1500 циклуси со полнење/празнење.
Доколку „обичните„ батерии би ги замениле со оние кои би содржеле супер-кондензатори, мобилните телефони би можеле целосно да се наполнат за неколку секунди, и би немало потреба од полнење најмалку една недела.
Технологијата сè уште не е спремна за комерцијална употреба бидејќи тимот работи на тоа прво да ја патентира, а откога би се појавила на пазарот може да претставува иднина на електрониката, од смартфони, уреди што се носат, до електрични возила.