Левитирачката аудио опрема не е ништо ново, но е секогаш интересна. Сега и компанијата LG го претстави својот „дел од колачот“ на ваквите уреди на пазарот, новиот PJ9 портабилен Bluetooth звучник.
Самиот звучник има дизајн вообичаен за звучниците кои звукот го шират под агол од 360 степени, и лебди во воздух врз базата наречена станица за левитација. Таа има вградено електромагнети кои го држат звучникот во воздух, но истовремено функционира и како сабвуфер, кој според зборовите на LG би требало да дава импресивен бас.
Звучникот го шири звукот користејќи двојни пасивни радијатори за репродукција на силни средни фреквенции, и јасни и чисти високи фреквенции. Целиот уред е направен според IPX7 спецификациите, што значи дека преживува не само пад, туку и прскање/потопување во вода.
Од LG тврдат дека батеријата издржува до 10 часа свирење, а кога веќе е при крај (после околу 8 часа), звучникот автоматски почнува да се спушта врз станицата за левитација.