Колку пати кога сте пробале да ги избришете рацете со пешкирот во купатилото, дури отпосле сте забележале дека тој не бил воопшто сув или веќе имал „фатено“ мирис? Ситуацијата се влошува доколку не живеете сами и повеќе луѓе користат еден ист пешкир, а да не зборуваме пак што се случува доколку правите некоја домашна забава.
Решение за ова би било или инсталирање на сушач за раце како оној кој се вградува во комерцијалните објекти ( и што скоро никој не го прави во домашни услови), или на UV TowerDryer Hanger гаџетот кој ќе ви помогне да се справите, т.е барем да го намалите бројот на бактерии со кои што потенцијално може да си ги избришете рацете.
Се работи за држач за пешкир(и), кој има пластичен круг кој зрачи UV светлина и вентилатор кој го забрзува процесот на сушење. Вентилаторот може да работи до 5 часа, додека UV неонката има тајмер од 20 минути. Сè што е потребно е да го оставите пешкирот да виси низ кругот изложен на светлината, за да се неутрализираат бактериите во него. На овој начин може да се „прочистат“ и разни крпи, кеси, и разни ситници кои се употребуваат за одржување на личната хигиена.
Се приклучува на ѕидниот приклучок за струја, доаѓа со далечинско со кое може да го вклучите или исклучите, а чини нешто помалку од $100.