Артисанополис е прототип на пловечки град, дизајниран од тимовите на Roark 3D и Fortgalt, за потребите на архитектонскиот дизајнерски натпревар на Seasteading институтот.
Градот би бил потполно стабилен на вода и би се напојувал исклучиво од соларна и хидроелектрична моќ. Оранжериите би произведувале голем дел од залихата на храна, додека централата за десалинација би произведувала вода безбедна за пиење, а градот би бил потполно опколен со „кршачи на бранови“ кои ќе ги спречуваат потенцијалните оштетувања на структурата од брановите.
За да овој град стане реалност, институтот потпишал меморандум со француско -полинезиската влада за започнување на конструкцијата до 2019-та.
Веќе 5 години, Seasteading институтот ја истражува ефикасноста на еден ваков пловечки град, а сега морат да докажат дека истиот би бил и економски исплатлив. Покрај сите потребни легални истражувања (кој ќе раководи со градот, дали ќе биде политички автономен итн.), важно ќе биде да се утврди и неговото еколошко влијание. Бидејќи нивото на океаните постојано расте и ги загрозува крајбрежното население и инфраструктура, институтот верува дека вакви пловечки острови би биле потенцијално решение за тој проблем.
Градови како Артисанополис еден ден би можеле да вдомат значаен број на луѓе, притоа не наштетувајќи и на околината.