Шест студенти по инженеринг на додипломски студии на MIT дизајнирале пренослив уред кој може во реално време да конвертира текст во Брајово писмо.
Нивниот прв прототип бил креиран во 2016-та, а од тогаш уредот наречен Tactile има претрпено голем развој и сега неговата големина е колку на чоколаден бар.
Она што го издвојува Tactile од останатите преведувачи на Брајовото писмо е неговата ниска цена – повеќето слични уреди се скапи и преводот е лимитиран на текст кој е на располагање исклучиво во дигитална форма. На пример, уредот HumanWare Braillant се приклучува на компјутер или мобилен уред за да преведува текст во Брајово писмо, а чини $2595, додека креаторите на Tactile се надеваат дека ќе можат нивниот уред да го продаваат за помалку од $200.
Студентите кои го имаат измислено имаат планови да го усовршуваат, во што од огромна помош ќе им биде наградата од $10 000 која ја имаат добиено од MIT.
Моментално, камерата на Tactile може да снима слики само во нејзиното видно поле, а целта е уредот да биде што повеќе сличен на рачните скенери со кои може одеднаш да се скенира цела страница.
Tactile би требало да се појави на пазарот во наредните 2 години и ќе ја направи секоја книга во секоја библиотека достапна за оние кои ја користат Брајовата азбука.