Колку светот станува потопол, толку повеќе луѓето ги вклучуваат клима уредите. Но, колку повеќе клима уреди се вклучуваат, толку светот станува потопол и така во круг.
Сега, нова технологија развиена од научници од САД и Кина би можела ова да го промени.
Истражувачите од универзитетот Стенфорд измислиле нов вид на технологија за соларни панели која не само што ја собира светлината од Сонцето и ја конвертира во електрицитет (како конвенционалните панели), туку вишокот топлина истовремено го исфрла во Вселената.
Принципот на кој што овие нови панели функционираат е наречен радиативно ладење, каде некој објект (згради или сопственото тело) емитира топлина во форма на инфрацрвена светлина.
Кога објектите го прават тоа, тие симултано губат топлина во процесот наречен термална радијација, но таа не секогаш може да ја помине нашата атмосфера и да продолжи во Вселената.
Атмосферата е еден вид на „ќебе“ околу Земјата, кое го отежнува патот на топлината за да стигне до Вселената. Но, во ова „ќебе“ има дупки, низ кои таа лесно може да го стори тоа.
Новиот прототип кој истражувачите го развиле е прв обид да се комбинира уред за радиативно ладење со конвенционален соларен панел, креирајќи хибридна технологија која истовремено апсорбира сончева светлина и емитира инфрацрвена светлина кон небото.
Уредот е составен од конвенционален соларен панел со големина на CD, кој е поставен низ кружен радиативен ладилник направен од силициум нитрид, силициум и слоеви алуминиум затворени во вакуум.
Идејата е таа што соларниот панел е транспарентен за инфрацрвената светлина, па така додека ја апсорбира сончевата, инфрацрвената поминува низ него и се емитира во Вселената преку атмосферските „дупки“.
Овој прототип докажал дека концептот функционира, но не создавал електрицитет. Следниот чекор ќе биде токму тоа - да се создаде комплетно функционална соларна ќелија со елементи кои нема да ја блокираат инфрацрвената светлина да продолжи кон Вселената, со што нашата планета нема дополнително да се загрева.