Автомобилската корпорација Continental во соработка со стартапот ANYbotics ја комбинирала мобилноста на четириножно роботско куче во стил на роботите на Boston Dynamics, со автономно возило за испорака.
Резултатот прикажан на овогодинешниот CES во Лас Вегас претставува една визија за иднината на системите за испорака.
Концептот е необичен: автономно возило би запрело на одредена адреса и од него би излегле едно или повеќе роботски кучиња (кои ANYbotics ги нарекуваат ANYmals) кои би ја комплетирале испораката. За време на демо презентацијата, ваквите роботи се качувале по скали па дури и ѕвонеле на ѕвончиња на вратите.
Компанијата вели дека ваквите испораки би се одвивале 24/7 и би биле идеални во урбани средини каде е потребна испорака „до врата“.
Компаниите како Boston Dynamics имаат направено голем напредок во создавањето на четвороножни роботи кои можат, на пример, да се качуваат по стрмни скали и да мапираат комплексни опкружувања, а доколку такви роботи се користат за испорака на храна или пакети, тоа би можело да ја револуционизира оваа индустрија.