iRobot, компанијата која е производител на познатата роботска правосмукалка Roomba, ја претстави својата автономна косилка за трева наречена Terra.
Додека останатите вакви косилки бараат од нивните корисници прво да инсталираат (потенцијално скапи) жици кои би служеле како ограда т.е граница до која косилката може да се движи, Terra функционира на друг начин.
Сопственикот треба да постави безжични столпчиња низ дворот и мануелно да го вози роботот само еднаш околу периметарот, со што тој ќе креира мапа на дворот во неговата меморија – слично како што Roomba-та креира мапа на домот на корисникот.
Откако ќе го направи тоа, корисникот преку iRobot HOME апликацијата може да постави распоред кога роботот треба да ја коси тревата.
Разните сензори на Terra овозможуваат роботот да ги избегнува неочекуваните пречки низ тревникот, а кога батеријата ќе почне значително да ослабува тој самиот ќе се врати на станицата за полнење. Според соопштението за медиумите, Terra во Германија ќе започне со продажба оваа година, а подоцна и во САД.
Цената сè уште не е објавена, но останатите автономни косилки за трева чинат од $600, па до $3500, па така тешко е да се претпостави колку таа ќе изнесува за Terra.