Sony во партнерство со Yamaha креираа автономно возило кое истовремено служи и како подвижен билборд. Наречено SC-1, ова возило е дизајнирано за користење во тематски паркови, терени за голф и во комерцијални цели.
Електричниот SC-1 може да собере 5 луѓе и да постигне максимална брзина од 20км/ч., а има полно ултра-чувствителни сензори и камери кои му помагаат да ја скенира околината и да е „свесен“ за неговото опкружување. SC-1 е фузија на возачката автономна технологија на Yamaha и на дисплеите на Sony за прикажување на слики во висока резолуција во внатрешноста на автомобилот, кои овозможуваат патниците да можат да гледаат што се случува надвор од возилото дури и навечер, без потреба од фарови.
Внатре, 49-инчен 4K монитор дава приказ на надворешниот свет, додека четири 55-инчни 4К дисплеи од надворешната страна прикажуваат реклами или разни слики/видеа.
Со помош на вештачка интелигенција, возилото може да ја утврди демографијата на минувачите, и да ги оптимизира промотивните материјали кои ги прикажува базирано на фактори како години на старост и пол.
2D LIDAR системите и ултрасоничните сензори ќе акумулираат податоци поврзани со патувањата, кои потоа ќе се употребуваат за анализи со кои возилото ќе „учи“ и ќе го оптимизира возењето, а сите 4 тркала ќе имаат хидраулични сопирачки.
Двете компании планираат ова возило да почне да се употребува во Јапонија некаде во 2019-та или до март 2020-та.