Шведската компанија Hövding ја претстави 3-тата генерација на нивната велосипедска „кацига“ – уред во форма на крагна кој во себе содржи airbag, т.е воздушно перниче, кое се активира во случај на удар.
Наречена најбезбедна велосипедска кацига во светот, таа се дува за 0.1 секунда и формира заштита околу вратот и главата.
Крагната користи сензори кои ги читаат моделите на движење на велосипедистот 200 пати во секунда и штом детектира абнормални движења предизвикани од незгода, се активира воздушното перниче кое ефикасно го фиксира вратот и спречува повреди на главата.
Батеријата која е вградена во овој уред трае и до 12 часа, а корисниците можат да го поврзат со нивниот смартфон преку bluetooth конекција, со iOS и Android апликација.
Hövding кацигата лесно се става и отстранува со помош на патент на предната страна, а ја има во една големина која може да се адаптира за сечиј врат. Моментално таа може да се купи преку сајтот на Hövding и чини околу 280 евра, а досега околу 185 000 велосипедисти ја имаат купено.