Заштитата на елекронските уреди со лозинка веќе е застарен метод, најчесто заменет со биометриски сигурносни системи со кои корисникот на уредот се идентификува преку, на пример, отпечатокот на прст, глас, неговото лице и сл.
Сега, истражувачи од државниот универзитет на Њујорк смислиле нов пристап, наречен EarEcho.
Се работи за нова биометриска алатка која користи звучни бранови за идентификување на корисникот според уникатната геометрија на неговиот ушен канал – информација која ќе биде исклучително тешка за да открие со цел да се дуплира односно фалсификува.
Тимот истражувачи искористил нормални слушалки за уши кои биле модификувани со додавање на микрофон свртен кон ушниот канал, а процесот за идентификација е следниот: кога низ звучникот се испушта звук во увото на корисникот, тој се движи низ ушниот канал и се рефлектира назад во новиот микрофон во слушалката. Преку анализирање на акустичните информации од звукот и од неговото ехо, чии карактеристики се исклучително поврзани со геометријата на ушниот канал, се добиваат уникатни карактеристики на корисникот со кои се верификува неговиот идентитет.
Прототипот на EarEcho уредот бил способен да ги идентификува корисниците со 95% точност, кога бил тестиран врз 20 субјекти на мноштво локации (трговски центри, улици и сл.). Тоа го постигнувал за една секунда, а доколку анализирањето траело 3 секунди, точноста му се зголемувала на 97.5%.
Ваквата технологија би можела да се користи за отклучување на смартфони, за автентикација преку телефон и идентификување (и потврдување) на идентитетот на личноста со која што се зборува или пак за потврда на сопствениот идентитет доколку, на пример, комуницирате со службеник во банка или слична установа.