Додека COVID-19 вирусот се шири насекаде во светот, болниците во 10 провинции во Кина со помош на 3 вида на роботи се обидуваат да го спречат неговото ширење.
Едниот е наменет за испорачување на храна, вториот е санитарен и третиот ги насочува посетителите на болницата со цел да избегнат контакт со луѓе, со тоа спречувајќи го понатамошното ширење на заразата.
Роботите биле развиени со интернационална соработка помеѓу неколку компании, меѓу кои е и американската Orbbec, која произведува сензори за 3D камери.
Роботот за испорака на храна е одговорен за носење на храна на пациентите, како и разни медицински материјали, со тоа намалувајќи го обемот на работа на медицинскиот персонал, како и потребата тие да се изложени на вирусот а со тоа и на неговото ширење. Санитарниот робот, пак, асистира во чистење на болниците, додека оној за насочување е способен да ја испланира оптималната патека кон посакуваната локација на посетителите.
Во прв ред во секоја епидемија се медицинските работници кои се во секојдневен контакт со инфицираните лица, а овие роботски асистенти тој контакт го минимизираат, што му овозможува на медицинскиот персонал да остане фокусиран на овозможување на најдобрата нега, без ризик од инфекција.