Еврокомесарот за правда Вивиен Рединг ги советуваше земјите членки на ЕУ да покренат постапка против фирмата Apple бидејќи, како што наведе, некоректно ги информира купувачите за правата на гаранција за производите, премолчувајќи важни факти, пренесува Танјуг.
На овој начин, по Google, која веќе имаше работа со заштитниците на правилата за пазарна конкурентност, сега Рединг има намера на вториот по големина американски концерн-Apple, да му објасни како се игра по европските правила.
На купувачите на iPhone, iPad или Mac, Apple им нуди план за заштита на производите (Apple Care) со кои нормалмната гаранција од една година се продолжува на две или три години, но тоа во случајот на Macbook чини 249 евра.
Apple, меѓутоа, пропуштил на купувачите да им понуди јасни, веродостојни и комплетни информации за гаранцијата што им следи според правилата на ЕУ.
ЕУ смета дека Apple премолчува важни информации, Претседавачот со Правниот одбор на Европскиот парламент Клаус-Хајнер Лене, вели дека секој купувач во ЕУ автоматски стекнува право на двегодишна гаранција.
Од друга страна, на Apple мора да му се признае дека неговата гаранција ги надминува вообичаените одредби и ги покрива сите недостатоци и слабости на производите, а не само оние кои биле присутни веќе при купувањето.