Во последно време се почесто можеме да видиме проекти во кои се развиваат роботи кои ќе служат за пронаоѓање на луѓе по рушевини по воени и природни катастрофи.
Идејата е роботите наместо луѓето да влегуваат во места на кои има опасност од рушење, како и пребарување на рушевини во потрага по преживеани, но до сега тоа функционираше исклучиво со помош на луѓе оператори кои преку камери и безжични врски тоа го правеа преку нивните „очи“.
Таков систем има свои ограничувања, бидејќи кога роботот се најде во просторија од која нема сигнал за воспоставување на безжична врска, што е чест случај во рушевините полни со армиран бетон и железо, операторите не можат да видат што се случува и има ли на тие места жртви.
Научниците од мексиканскиот Универзитет Guadalajara (UDG), затоа одлучија на роботите да им дадат поголема автономија, односно способност сами да ги откриваат жртвите, па затоа креираа алгоритам кој ќе разликува луѓе од разни објекти, па дури и кога се наоѓаат во целосно неприродни положби.
Со користењето на комбинација на камери, сензори, ласери и инфра црвени системи роботот може да креира 2Д мапа на околината и да изработува мапи со можни прилази и слободни насоки за движење, воедно ќе снима слики со стереоскопска HD камера.
Потоа паметниот алгоритам во тие прикажувања може да препознае луѓе, односно да ги разликува нивните облици од другите објекти. Научниците својот алгоритам го „хранат“ со сите човекови „делови“, екстремитети и пози, за неговата вештачка нервна мрежа да биде прецизна во препознавање на тие примероци.
За сега тимот користи роботи од компанијата iRobot, но велат дека во иднина нивниот алгоритам би можел да функционира во роботи кои не само што ќе ги откриваат жртвите и ќе им јавуваат на спасувачите за нивните локации, туку би можеле и сами да ги извлекуваат од местата на несреќата, но пред тоа алгоритамот би требало да биде надграден со систем кој би препознавал повреди, за да не направи поголема штета од корист.