Вчера, мама ме легна да спијам. Ми раскажа приказна, една нова, рече таа.
Нејзината прекрасна приказна беше вкусна мамка. Вчера, имав само 8 години.
Се разбудив со болка во главата. Розевите завеси на прозорите станале бели.
Но, куклите ме зјапаа на ист начин. Никогаш не ми кажаа кого да обвинам.
Дали мама беше таа која сакаше да пораснам? Ги гледав глуварчињата разлетани, како што таа ги дуваше.
Или, пак, можеби спиев предолго додека таа ми ја пееше омилената песна...
Мојата коса сега е долга, на ноктите имам француски маникир. Гледам разлика во секој милиметар од себе.
Колку што можам да се сетам, јас никогаш не го посакав сево ова.
Лина Меди