Славниот британски готвач Џејми Оливер најави дека ќе затвори повеќе ресторани од својот синџир „Џејмис италијан во Велика Британија.
Како главна причина тој ја наведува одлуката на Велика Британија да истапи од ЕУ, што доведе до поскапување на состојките за италијанските јадења што се подготвуваат во неговите ресторани.
Ќе се затворат шест ресторани, меѓу останатите во Абердин, во Шкотска, и во близина на Катедралата Свети Павле во Лондон.
-Секој сопственик на ресторан знае дека на пазарот ситуацијата е тешка и дека притисоците и неизвесноста по одлуката за Брегзит дополнително ја отежнаа ситуацијата, објасни директорот на „Џејмис италијан“, Сајмон Благден.
Затворањето ќе загрози 120 работни места, што е помалку од пет отсто од вработените во овој синџир, наведе Благден, кој вети дека на работниците ќе им понуди други работни места во групата.
„Џејмис италијан“ ќе продолжи да се развива во странство, со план да отвори 22 нови ресторани со партнерите, се наведува во оваа група.„
Џејми Оливер сега има 42 ресторани во синџирот „Џејмис италијан“ во Велика Британија, а неговото име го носат и 36 ресторани во странство.