Од 2012 навака бројот на бездомници кои живеат во Њујорк е зголемен за околу 40%, што се должи на недостатокот од живеалишта по прифатливи цени и неефикасните прописи за нивно изнајмување.
Сега, креативната агенција Framlab базирана во Њујорк верува дека пронашла ефективно и креативно решение за овој проблем.
Тие предлагаат конструирање и монтажа на скелиња на страните од зградите каде нема прозорци, во кои би се сместиле шестоаголни структури. Проектот наречен „Homed” би ги искористувал „вертикалните површини„ кои Њујорк ги нуди, кои сега седат неискористени.
Од Framlab објаснуваат дека во секоја од овие шестоаголни структури комфорно би можела да се смести една личност, а ентериерот би се нагодувал според нејзините потреби и животен стил.
До нив би се пристапувало преку скалила вградени во скелињата, а структурите би биле лесни за склопување и растурање во случај, на пример, тој дел од зградата да треба да се реновира или проширува.
Прозорците со кои тие би биле опремени нудат транспарентност и приватност, а на нив може да се прикажуваат реклами или уметнички дела – што значи дека постои можност ваквите живеалишта да генерираат заработка и потенцијално самите да се исплатуваат.
И покрај креативноста и амбицијата на овој проект, агенцијата вели дека Homed не е комплетно решение за проблемот со бездомниците, туку е инструмент кој игра улога во решението.
