-Турни ме. Инаку нема да скокнам, викна Сашо.
-Ха, ти си единствениот што досега ми рекол да го турнам во длабок вир“, се насмеа Влатко Контиќ, водичот, и го турна.
-Јакоооооооо, 100 пати појако од рафтингот, извика Сашо откако ја извади главата од водата, посегајќи по воздух. И продолжи да плива низ тесниот кањон.
Веќе 10-тина години Влатко Контиќ е водич низ кањонот Невидио и многумина ги има доведено до границите на нивната физичка и ментална снага водејќи ги низ теснеци, вирови, вртлози и поттикнувајќи ги да скокаат од 10 и повеќе метри во ладната вода на кањонот Невидео.
Низ кањонот Невидео, кој се наоѓа на 20-тина км од Жабљак, Црна Гора и на околу 360 км од Скопје, тече реката Мала Комарница, која исекла пат низ карпите, формирала слапови и водопади, изделкала ѕидови во неверојатни форми. Паднатите дрва низ кањонот додаваат дополнителни екстремни точки на веќе напорното движење низ кањонот.
Кањонот е долг 2.700 метри со висинска разлика од 125 метри меѓу почетокот и крајот на кањонот, а карпите во кањонот се високи и до 450 метри. Водата е тиркизно зелена, но многу ладна (околу 5 – 6 степени Целзиусови) и од почеток влегувањето во водата е непријатно. Но, само до првиот скок. Потоа, од многуте активности низ кањонот, студот станува второстепен.
Кањонингот (Canyoning) е авантуристичка активност која вклучува движење низ тесни кањони со искачување и слегување по карпи, низ водопади и теснеци, скокање во длабоки вирови, пливање низ ладна вода. Основна опрема за кањонинг е: неопренско одело дебело и до 7 мм (или две неопренски одела за зиморливите), шлем, појас, неопренски чорапи и сопствени патики. Секој треба да знае да плива и да не се плаши од скокање во длабока вода.
Најважно е да се слушаат насоките на водичот и брзо да се поминува низ кањонот, бидејќи секое непредвидено задржување, долго премислување дали да се скокне или не, може да доведе до ситуација на хипотермија (премрзнување). Изгледа опасно и ладно, но кањонингот е многу возбудлива и адреналинска активност.
Текст и фото: Г. Николоски
Доколку ви се допадна овој текст и сте љубители на спортските авантури, повеќе содржини можете да прочитате на ШУМ - Интерактивно списание за сите љубители на спортот